Nakumpiska ang mokapin sa Php200,000.00 nga kantidad sa ilegal nga drugang shabu pinaagi sa gilusad nga search warrant operation sa kapulisan sa Purok 2, Tubod Brgy. Galas, Dipolog City niadtong Hulyo 6, 2026.
Gipangunahan ang maong operasyon pinaagi sa Regional Drug Enforcement Unit IX (RDEU9), Team Zamboanga del Norte kauban ang Dipolog City Police Station CDET ug 1st ZNPMFC bitbit ang search warrant nga gi-issue sa Regional Trial Court, Ninth Judicial Region, Branch 6, Dipolog City hinungdan sa pagkasikop ni alyas Tanggo, 59-anyos, giilang street level individual sa drug’s watchlist ug residente sa nasangpit nga barangay.
Narecover gikan sa suspetsado ang 5 ka gagmay nga pakete ug 11 ka mga medium sized nga pakete sa shabu nga motimbang sa 30 gramos ug nagkantidad ug Php204,000.00. Dugang nasakmit gikan sa dinakpan ang mga drug paraphernalias ug mga non-drug items.
Sa pagkakaron balhog sa selda sa Dipolog City Police Station ang dinakpan ug mag-atubang sa kasong paglapas sa RA 9165 kon Comprehensive Dangerous Drugs Act of 2002 samtang ang mga nakumpiska nga mga ebidensya giturnover ngadto sa Zamboanaga del Norte Provincial Forensic Unit alang sa eksaminasyon.
