Nakitaan og positibong epekto sa Department of Education (DEPED) Region 9 ang pagpatuman sa three-term school calendar sa tanang pampublikong eskwelahan sa Zamboanga Peninsula Region.
Matud ni DEPED 9 Curriculum and Learning Management Division (CLMD) Chief, Dr. Eugenio Penales, ilawom sa three-term school calendar, gibahin sa tulo ka termino ang tanang learning competencies aron mas hapsay ug epektibo ang pagpatuman sa kurikulum diin mas taas ang adlaw alang sa instructional block nga naghatag ug mas igo nga panahon sa pagtudlo sa mga estudyante.
Niya pa, niini nga pagpatuman, ang mga magtutudlo hugot nga gidid-an nga mu-absent o dili mutungha panahon sa instructional block gumikan may napulo ra ka adlaw nga gigahin sa matag termino alang sa mga extracurricular activities sa mga kabataan.
Segun ni Penales, padayon karon nga gimonitor sa DEPED Region 9 ang implementasyon sa three-term school calendar aron masiguro nga epektibo kini ug makatubag sa panginahanglan sa mga magtutudlo ug mga estudyante.
Dugang pa ni Penales, kon magpadayon ang maayong resulta sa implementasyon, siya malaumon nga mas mapalig-on pa ang kalidad sa pagtudlo ug pagkat-on sa mga estudyante, samtang gipadayon usab ang pagtan-aw sa mga paagi aron mas mapauswag pa ang Sistema.
