Patay ang usa ka 41-anyos nga Chinese national human gituohang nalumos sa usa ka resort sa Barangay Adecor, Kaputian District, Island Garden City of Samal (IGACOS) Davao del Norte, hapon niadtong Hulyo 6, 2026. Giila ang biktima nga si Hou Gaopo, ulitawo, ug nagpuyo sa Bel-Air Subdivision, Buhangin, Davao City.
Base sa CCTV footage, nakita ang biktima nga naglakaw uban sa iyang mga kauban sa baybayon mga alas 3:45 sa hapon sa wala pa sila nanglangoy sa dagat. Sa ulahi, nadungog sa mga lifeguard ang usa sa iyang mga kauban nga nangayo og tabang ug mitaho nga adunay nalumos nga gibana-banang 9-10 feet ang giladmon. Gidala gilayon kini sa hospital sa mga mirespondeng personahe.
Gisulayan pa sa mga doktor nga luwason ang iyang kinabuhi pinaagi sa mga resuscitation procedure. Apan, bisan pa sa tanang paningkamot, gideklarar siyang Dead on Arrival (DOA) alas 4:50 sa hapon.
Matud sa doktor, ang hinungdan sa kamatayon mao ang acute cardiorespiratory failure type 1, nga ikaduhang resulta sa gituohang pagkalumos.
Girekomenda sa doktor ang post-mortem examination aron matino ang eksaktong hinungdan sa kamatayon. Apan, midumili ang pamilya sa pagpahigayon og autopsy. Human niini, gibalhin ang lawas sa biktima ngadto sa usa ka purenarya alang sa hustong pag-atiman.
Samtang subay sa imbestigasyon sa kapulisan, wala silay nakitang timailhan nga adunay foul play nga nalambigit sa insidente.
