Nadakpan ang usa ka 43-anyos nga lalaki human kini gipasanginlang nangawat og nagkadaiyang baligya gikan sa usa ka tindahan sa MR. DIY Tagum City, gabii sa Hulyo 7, 2026. Base sa report sa Tagum City Police Station, ang suspetsado giila nga si alyas Allan, minyo, walay trabaho ug residente sa DARA Subdivision, Barangay Visayan Village, Tagum City.
Sumala sa imbestigasyon, namatikdan sa empleyado sa giingong tindahan nga si alyas Kevin nga gitago sa suspetsado ang daghang merchandise sulod sa iyang sinina samtang naglibot sa tindahan. Tungod sa iyang pagduda, padayon niyang gibantayan ang lihok sa maong lalaki.
Sa dihang migawas na ang suspetsado sa tindahan nga wala mobayad sa mga gipanguha, gilayon siyang gipugngan ug gi-inspeksyon sa empleyado. Didto nakit-an ug nabawi ang mga gituohang gikawat nga mga butang lakip ang usa ka USB cable, usa ka phone stand, ug tulo ka smartwatches nga adunay kinatibuk-ang kantidad nga P475.00.
Dugang sa report, gipahibalo usab sa mga pulis ang suspetsado sa hinungdan sa iyang pagdakop ug sa iyang mga katungod subay sa balaod. Gidala gilayon sa Tagum City Police Station ang dinakpan alang sa hustong dokumentasyon ug imbestigasyon.
Samtang, sumala sa Store Supervisor sa nga si Lloyd Conato, andam na ang legal counsel sa kompanya sa pag-andam sa mga dokumento alang sa pagsang-at og angay nga kaso’ng kriminal batok sa dinakpan sa Office of the City Prosecutor.
Photo Courtesy:The Guardian
