Unod sa mga storya karun sa social media ang aktor ug rapper nga si Carlos Agassi human mabash sa pipila ka netizens tungod sa porma sa iyang lawas.
Sa comment section sa iyang mga post, adunay mga netizens nga miingon nga “awkward” kuno tan-awon ang iyang lawas, samtang ang uban nagkomento nga mura na kuno siyag “nasobraan sa workout.” Aduna pay mga nanaway nga nagtandi sa iyang hitsura sa usa ka “tikbalang,” ug adunay usab niingon nga dili na balanse tan-awon ang iyang muscles.
Wala kini palabya ni Agassi ug mitubag pinaagi sa usa ka video nga iyang gipost sa social media. Matod niya, naglaom siya nga ang mga tawo nga nanaway kaniya adunay maayong trabaho, sikat ug maayo usab ang panagway, apan sa iyang nakita, dili tanan sa mga nagkomento maoy ingon niana.
Bisan pa sa iyang tubag, gipadayag ni Agassi nga mas maayo unta kon magtinahuray ang tanan sa social media. Matod pa niya, mas angay nga magbinuotan ang matag usa ug magmatinahuron, ilabina nga kinahanglan magpuyo uban ang kahadlok ug pagtahod sa Ginoo.
Si Carlos Agassi dugay nang aktibo sa industriya sa showbiz isip aktor, rapper ug content creator. Sa miaging mga tuig, kanunay siyang nagpakita sa social media sa iyang fitness journey ug workout routines.
Sa pagkakaron, nagpadayon ang nagkalainlaing reaksyon sa internet, diin adunay mga netizens nga mipabor kang Agassi ug nanawagan sa paghunong sa body shaming, samtang adunay uban nga mipadayon gihapon sa ilang pagsaway.
Photo Courtesy: PEP.ph
