Pakyas ang Gilas Pilipinas nga makahimo og milagro human gilubong sa walay pildi nga Australia Boomers sa iskor nga 92-49 didto sa RAC Arena, sa pagtapos sa ikatulong window sa 2027 FIBA Basketball World Cup Asian Qualifiers. Dakong kakuwangon alang sa Gilas ang dili pagdula sa ilang naturalized player nga si Justin Brownlee, hinungdan nga daling gilupig ug nabiyaan ang nasudnong koponan sa second half sa dula.
Tungod sa pagkawala ni Brownlee, walay bisan usa ka Pilipino nga magdudula ang naka-iskor og double digits. Si Dwight Ramos ang nangulo sa Gilas nga adunay siyam ka puntos, samtang si June Mar Fajardo miamot og walo ka puntos ug pito ka rebounds, ug si Mike Phillips usab ang mibira sa rebounding pinaagi sa iyang unom ka puntos ug 12 ka rebounds.
Bisan pa man og nakatala og upat ka sunod-sunod nga pildi ang Pilipinas alang sa ilang 2-4 nga baraha mosulod gihapon ang Gilas sa second round sa qualifiers diin sunod nilang makatigi ang mga nasud sa Syria, Iran, ug Jordan. Gikatakda ang mosunod nga home-and-away qualifying window karong umaabot nga Agosto 27 hangtod 31.
Photo Courtesy:FIBA Basketball
