Misaka na sa ₱18.55 trilyon ang kinatibuk-ang utang sa gobyerno sa Pilipinas sa pagtapos sa bulan sa Mayo 2026. Sumala kini sa datos nga gipagawas sa Bureau of the Treasury nga nagpakita nga nagpadayon ang pag-usbaw sa utang sa nasud.
Mas miusbaw kini kung itandi sa ₱18.47 trilyon nga natala sa katapusan sa Abril, kung asa, misaka kini og 0.41 percent o katumbas sa dul-an ₱76.1 bilyon sulod lamang sa usa ka bulan. Nagpasabot kini nga padayon ang pagpanghulam sa gobyerno, aron matubag ang nagkadaiyang gastuhan ug obligasyon sa nasud.
Bisan pa sa pagsaka sa utang, padayon nga gipasalig sa Bureau of the Treasury nga responsable ang pagdumala sa pondo sa gobyerno ug ang pagpanghulam gihapon gihimo, aron suportahan ang mga programa, imprastraktura ug ubang prayoridad nga proyekto alang sa kalambuan sa nasud.
Photo Courtesy: Asia News
