Pormal nang giablihan ang pagsaulog sa Nutrition Month karong bulana sa Hulyo nga nagdala sa temang, “Nutrition at kalikasan ating pangalagaan.”
Gihanduraw ug gihatagan og dakong pagtagad ni Ar. Reginaldo T. Guillen, ang OIC Nutrition Program Coordinator sa National Nutrition Council (NNC) Region X, ang kamahinungdanon sa tema. Sumala kaniya, kanunay nga magkaatbang ug magkalambigit ang kahimsog sa panglawas sa tawo ug ang kahimtang sa kinaiyahan.
Gihatagan og gibug-aton ni Guillen nga ang maayong panglawas sa katawhan nakadepende pag-ayo sa palibot. Tungod kay usa ra ang kalibutan, dili sumala pa angay nga pasagdan ang kinaiyahan kay sa kapeligrohan, ang katawhan ra gihapon ang grabeng maapektuhan.
Dugang pa niya, kung aduna may mga programa alang sa nutrisyon, kinahanglan nga dungan sab niini ang mga programa alang sa pagpanalipod sa kinaiyahan nga matinud-anong gipatuman sa panggamhanan.
Sa katapusan, nanawagan si Guillen sa publiko nga labing mahinungdanon ang panaghiusa ug kooperasyon sa matag usa aron magmalampuson kini nga adbokasya alang sa mas himsog nga komunidad ug mas luwas nga palibot.
Photo courtesy: National Nutrition Council Region X/ Facebook
