Giawhag sa Armed Forces of the Philippines ang tanang local Government unit (LGU) sa nasud nga opisyal nga ideklara ang Hulyo 12 isip West Philippine Sea Victory Day.
Nagsunod kini sa lakang sa Cebu City ug sa Labrador nga nagpasa og lokal nga mga polisiya aron sa pagsaulog sa makasaysayang 2016 arbitral victory sa Pilipinas. Sumala kang Roy Vincent Trinidad, bug-os nga gisuportahan sa AFP ang maong inisyatiba sa mga lokal nga panggamhanan.
Matod niya, ang maong mga lakang makatabang sa pagpalig-on sa kahibalo ug pagsabot sa publiko sa lehitimong legal nga kadaugan sa Pilipinas batok sa lapad nga pag-angkon sa China sa mga katubigan sa West Philippine Sea.
Dugang pa niya, pinaagi sa pag-institutionalize sa maong selebrasyon, gipamatud-an pag-usab sa mga LGU ang legal ug moral nga kadaugan sa nasud ubos sa 2016 Arbitral Tribunal Award.
Gipasiugda usab sa opisyal nga ang maong mga deklarasyon usa ka paagi sa pagpasidungog sa mga sundalo ug personnel nga nagpadayon sa pagpanalipod sa maritime interests sa Pilipinas.
Kahinumduman nga niaging bulan, nagpasa og resolusyon ang Cebu City alang sa tinuig nga pagsaulog sa WPS Victory Day matag Hulyo 12 ug giawhag usab ang Kongreso nga himuon kini nga nasudnong selebrasyon.
Samtang ang Labrador, Pangasinan, mipagawas usab og Executive Order alang sa tinuig nga paghandum sa arbitral ruling ug nagmando sa mga eskwelahan nga magpatigayon og mga kalihokan aron mapalawom ang kahibalo sa kahinungdanon niini.
Photo Courtesy: AFP
