Mikunhod og 79 porsiyento ang natalang kaso sa mpox sa Pilipinas karong 2026 kumpara sa samang panahon niadtong 2025, sumala sa Department of Health (DOH). Matud ni DOH Spokesperson Undersecretary Albert Domingo, adunay 44 ka kaso sa mpox nga natala gikan Enero 4 hangtod Hunyo 13 ning tuiga, kumpara sa 205 ka kaso sa samang panahon.
Gipasabot ni Domingo nga bisan adunay pipila ka lokal nga kaso, wala’y outbreak ug wala usab mosaka ang ihap sa mga nataptan.
Wala usab gipagawas sa DOH ang detalye sa matag pasyente aron malikayan ang diskriminasyon ug masunod ang Data Privacy Law, ilabina kay ubos ra ang gidaghanon sa mga kaso.
Gipasabot usab sa DOH nga ang mga local government unit mahimong mopagawas ug mga public health advisories kon gikinahanglan.
Ang mpox usa ka sakit nga mahimong matakod gikan sa hayop ngadto sa tawo ug mahimong mokatap pinaagi sa suod nga pisikal nga kontak.
Lakip sa mga sintomas niini ang hilanat, sintomas nga sama sa trangkaso, ug mga hubag o samad sa panit nga adunay nana nga mahimo usab kini nga mosangpot sa kamatayon sa pipila ka mga kaso.
