Moabot sa P230,000 nga cash prizes ang mahimong madaug sa mga modagan sa unang Governor’s Zero Hunger Run nga ipahigayon sa Agosto 2 ning tuiga sa Cebu Provincial Capitol Grounds.
Adunay lima ka kategoriya sa lumba, lakip ang 21-kilometer half marathon, 12K, 6K, 3K ug 1K. Ang kalihokan kabahin sa selebrasyon sa anibersaryo sa pagkatukod sa Probinsiya sa Sugbo ug usa sa mga nag-unang proyekto sa Cebu Provincial Sports Commission (CPSC).
Sumala ni CPSC Commissioner ug project chairman Francis Chad Salimbangon, tumong sa maong kalihokan ang paghatag og kalidad nga running experience alang sa mga partisipante samtang makasuporta sa grassroots sports programs sa probinsiya.
Gipasabot usab niya nga ang tema nga “Zero Hunger” nagpasabot nga siguruhon sa mga organizer nga adunay pagkaon ang tanang runners human sa lumba. Gilauman usab nga adunay mga food stations nga maghalad og mga pagkaon gikan sa lainlaing lungsod sa Sugbo.
Gawas sa cash prizes alang sa mga mananaog, adunay usab raffle prizes sama sa brand-new scooter, laptops, smartphones, washing machine, smartwatches, refrigerator ug gift certificates.
Target sa mga organizer ang 2,500 ka partisipante, ug kapin 1,000 na ang nakarehistro. Nagpadayon ang registration alang sa mga gustong mosalmot sa maong kalihokan.
Photo Courtesy: CDN DIGITAL
