Mokabat sa ₱5.8-milyones nga kantidad sa gituohang shabuang nasakmit sa kapolisan gikan sa usa ka High Value Individual nga giilang si alyas “Gabs,” 46-anyos, walay trabaho ug residente sa dakbayan sa Tacloban atol sa gilusad nga buy-bust operation sa mga operatiba sa Tacloban City Police Office–Drug Enforcement Unit (TCPO-DEU) sa pakigtambayayong sa Philippine Drug Enforcement Agency Regional Office 8, kagahapong adlawa, Hunyo 25, 2026.
Narekober gikan sa suspek ang duha ka heat-sealed ug onse ka hiniktan nga transparent plastic sachet nga adunay puting kristal nga substansiya nga gituohang shabu. Sumala sa kapulisan, ang mga nakompiskar nga droga adunay gibana-banang gibug-aton nga 850 gramos ug gibanabanaang kantidad nga ₱5,780,000, base sa Dangerous Drugs Board (DDB).
Gimarkahan ug giimbentaryo sa mga operatiba ang tanang ebidensiya sa lugar sa operasyon atubangan sa mga gikinahanglang saksi, subay sa gitakdang legal nga pamaagi. Ang mga nakompiskar nga gituohang ilegal nga droga ipadala alang sa laboratory examination, samtang ang nadakpan anaa na sa kustodiya sa Tacloban City Police Office alang sa hustong dokumentasyon ug pagpasaka sa kasong paglapas sa Republic Act No. 9165.
Photo Courtesy: Tacloban City Police Office
