Malipayong gipahibalo ni Mayor Cyrex Basalo nga magsugod na sa sunod tuig ang pagtukod sa bag-ong municipal hall sa Montevista pinaagi sa pondo nga nakuha gikan sa nasyonal nga gobyerno sa tabang ni Cong. Maricar Zamora.
Matod sa mayor, ang munisipyo dugay nang walay municipal hall sukad kini naguba tungod sa linog niadtong 2023.
Gilauman nga mahatag ang inisyal nga 100 milyones pesos alang sa unang yugto sa proyekto.
Sa laing bahin gipadayag usab ni Basalo nga karon lamang sa ilang administrasyon nagsugod ang pagtukod sa sanitary landfill sa lungsod nga nahimutang sa Barangay New Visayas. Ang yuta alang niini gipalit pa niadtong 2017 ug giproseso ang mga permit pinaagi sa pakigtambayayong sa DENR.
Samtang wala pa mahuman ang landfill, nagkasabot ang lokal nga kagamhanan ug usa ka pribadong landfill sa Monkayo aron didto temporaryong idisponer ang mga basura sa lungsod.
Photo Courtesy: Cyrex Labrador Basalo/FB
