Patay ang 52-anyos nga lalaki human gipunggutan ug ulo sa silingan niini nga nahitabo sa Purok 6, Barangay Mauswagon, lungsod sa Godod, Zamboanga del Norte niadtong Hunyo 20, 2026.
Ang maong biktima usa ka mag-uuma samtang ang suspect kinsa nasikop ra usab mao ang 29- anyos nga silingan niini.
Matod sa inisyal nga imbestigasyon sa Godod Municipal Police Station, adunay nahitabong panag-away sa duha nga nagsumikad sa dugay nang away sa yuta ug uban pang mga personal nga hinungdan. Atol sa panaglalis, gikataho nga migamit ug galvanized iron pipe ug puthaw ang biktima batok sa suspetsado. Misukol ang suspek ug gitigbas ang biktima ug pagkatumba gilungguan kini sa liog.
Dali ra usab nga nasikop ang suspect ug gidala ngadto sa kustudiya sa Godod Municipal Police Station samtang padayon ang mga personahe sa Scene of the Crime Operatives (SOCO) sa pagpahigayon sa tukmang pagproseso ug dokumentasyon sa crime scene.
Giandam na usab sa kapulisan ang tukmang kaso nga ipasaka ngadto sa suspetsado.
