Bitbit ang tinuoray nga espiritu sa Bayanihan, malampusong gipahigayon sa 102nd Infantry (IGSOON) Brigade ang usa ka Feeding Program ug Distribution of School Supplies sa Barangay Tenan, Ipil, Zamboanga Sibugay niadtong nakalabay nga adlaw.
Ang maong bayanihan outreach program natigayon pinaagi sa hiniusang pwersa ug pakigtambayayong sa Gawad Kalinga, Provincial Government sa Zamboanga Sibugay, Provincial Social Welfare and Development Office (PSWDO), 106th Infantry (TIGPANALIPOD) Battalion, ug sa Philippine National Police (PNP).
Sa katibuk-an, mokabat 350 ka mga estudyante gikan sa Madrasa Taha ug sa kasilinganang komunidad ang nakadawat og mga kompleto nga school supplies ug masustansyang pagkaon.
Tumong niini nga mahatagan og saktong suporta ang edukasyon ug panglawas sa mga kabataan, dungan sa paghatag kanila og kadasig nga ipadayon ang ilang mga damgo.
Gipasiugda sa militar nga ang maong inisyatiba nagpakita sa kalig-on sa panaghiusa sa mga ahensya sa gobyerno, pwersa sa seguridad, ug pribadong sektor alang sa pag-abag sa edukasyon, pagpalig-on sa pagsalig sa publiko, ug pagkab-ot sa malungtarong kalinaw ug kalambuan pinaagi sa pagpangga sa sunod nga henerasyon.
Photo Courtesy: 102nd Infantry (IGSOON) Brigade, Philippine Army
