Giawhag sa Housing Resettlement Office (HRO) sa Iligan City ang mga residente nga naapektuhan sa mga proyekto sa gobyerno nga moduol una sa implementing agencies, ilabina sa Department of Public Works and Highways (DPWH), aron mangayo og certification nga nagpamatuod nga sila naapektuhan sa proyekto.
Kini ang pamahayag ni Reynaldo Roque head sa HRO, human mahinabi sa Junader Radyo Iligan News team sa iyang opsina. Sumala kang Roque, mahimo usab nga mangayo og dokumento gikan sa City Engineer’s Office sa Iligan City ug sa ilang tagsa-tagsa ka barangay isip suporta sa ilang aplikasyon.
Dugang ni Roque, ang maong certification mahimong gamiton nga reference sa pag-evaluate sa mga aplikante. Human niini, kinahanglan nga moduol ang mga apektadong residente sa HRO diin hatagan sila og survey form nga ilang fill-upan.
Pinaagi sa maong proseso, masusi sa HRO kon kwalipikado ba ang aplikante nga makabenepisyo sa mga programa sa housing ug resettlement sa siyudad.
Gipasabot usab ni Roque nga ang papel sa HRO mao ang pag-implementar sa mga housing program sa lokal nga panggamhanan ug pagsiguro nga ang mga kwalipikadong pamilya mahatagan og hustong pagtagad ug oportunidad sa mga programa sa pagpuy-anan.
