Giklaro sa Cebu Pacific Air sa ilang polisiya sa pagdala og musical instruments human sa viral nga isyu nga nalambigit sa mga violin sa pipila ka miyembro sa Manila Symphony Orchestra.
Sumala sa airline, ang mga musical instrument nga dili masulod isip hand-carry baggage kinahanglan nga ipaubos sa ilang “CEB Special Baggage” service pinaagi sa Musical Instrument Allowance. Mahimo kini nga ma-avail panahon sa pag-book sa biyahe gamit ang CEB mobile app.
Ning viral ang isyu human mag-post sa social media ang production manager sa Manila Symphony Orchestra nga wala gitugotan isip carry-on baggage ang ilang mga violin bisan pa og gitugotan kini sa ilang nangaging mga biyahe sa Cebu Pacific ug uban pang mga airline. Mikatag usab sa social media ang mga hulagway sa mga miyembro sa orchestra nga nagkupot sa ilang mga violin sulod sa kabina sa eroplano.
Sa tubag sa airline, giingon niini nga nakabiyahe gihapon ang tanang pasahero nga adunay violin. Ang uban sa mga instrumento nakatuman sa gitakdang cabin baggage size nga 56 sentimetro x 36 sentimetro x 23 sentimetro.
Alang sa mga violin nga milapas sa maong sukod, gitambagan ang mga pasahero nga kuhaon ang instrumento gikan sa kahon niini. Ang violin case gi-check in nga walay bayad, samtang ang violin gidala mismo sa pasahero isip hand-carry.
Naglaum ang Cebu Pacific nga ang maong insidente mahimong pahimangno sa mga biyahero nga susihon una ang gidak-on sa ilang mga bagahe, musical instruments ug sporting equipment sa dili pa mobiyahe.
Photo Courtesy: Aerotime
