Gitulis sa mga wala mailhing armadong suspetsado ang gibana-banang ₱1.6 milyon nga cash gikan sa mga empleyado sa South Bank atol sa usa ka pagpanulis nga nahitabo sa Barangay San Miguel, Manolo Fortich, Bukidnon karong adlawa hunyo 17, 2026
Sumala sa pakighinabi sa Juander Radyo Malaybalay kang PLt. Col. Rogie Ortencio, ang mga biktima sakay sa usa ka Toyota Vios ug naggikan sa Libona padulong unta sa Landbank Manolo Fortich sa dihang kalit silang giovertake-an sa mga suspetsado sa dapit nga duol sa plantation sa pinya paingon sa Camp Phillips.
Gipabuthan sa mga suspetsado ang sakyanan sa mga biktima, hinungdan nga napugos sila nga mohapa sulod sa sakyanan tungod sa kahadlok. Human niini, gideklarar sa mga suspek nga tulis ug gikuha ang kwarta nga ilang gidala.
Giingong duha ka lalaki nga armado og mga short firearm ang miduol sa sakyanan sa mga biktima. Human sa krimen, misibat ang mga suspetsado sakay sa usa ka kolor itom nga pick-up.
Adunay tulo ka tawo sa sulod sa sakyanan sa panahon sa insidente, lakip ang usa ka security guard ug duha ka staff sa South Bank. Bisan pa sa nahitabo, walay naangol o namatay sa mga biktima. Nakahimo pa unta og return fire ang security guard apan wala kini makapugong sa mga suspetsado sa pagdala sa kwarta.
Sa pagkakaron, anaa na sa luwas nga kahimtang ang mga biktima ug gipadayon sa kapulisan ang imbestigasyon pinaagi sa pag-backtrack sa mga CCTV footage ug koordinasyon sa Scene of the Crime Operatives (SOCO) aron mailhan ug madakpan ang mga responsable sa maong krimen.
Photo Courtesy:Christian Paul Torrentira Baran
