Duha ka mga mag-uuma ang nakabsan sa kinabuhi human sa natalang pagpamusil sa Purok 2, Barangay Pili, Midsalip, Zamboanga del Sur, kagahapon, Hunyo 16, 2026.
Sa inisyal nga imbestigasyon sa kapulisan, samtang ang mga biktima sakay sa usa ka single motor gikan sa Barangay Pisompongan paingon sa Barangay Pili kalit silang gipamusil sa duha ka mga wala mailang mga suspetsadong lalaki.
Human sa insidente, ang mga suspetsado dali nga misibat paingon sa Barangay Balunay, Midsalip, Zamboanga del Sur.
Ang usa sa mga biktima naka-angkon ug daghang igo samad pinusilan hinungdan sa iyang hinanaling kamatayon, samtang ang laing usa sa mga biktima gidali ug dala sa pinakaduol nga tambalanan apan gideklarang declared dead on arrival sa attending physician.
Naglusad na usab ug hot pursuit operation ang kapulisan sa pakigkoordinar sa haduol nga municipal police station alang sa posibleng pag-ila ug pagdakop sa mga suspetsado.
Kasamtangan na usab nga gihimo ang pagproseso sa crime scene ug ang lawom nga imbestigasyon aron matumbok ang motibo sa nahitabong pagpamusil.
Photo Courtesy: ZSPPO – PIO
