Gisugdan na gahapong adlawa Hunyo 16 ang selebrasyon sa ika-71 nga Araw ng Barangay Mainit, Nabunturan, Davao De Oro pinaagi sa nagkadaiyang kalihokan nga pagapadayonon hangtod Hunyo 21.
Matod ni Barangay Kagawad Luciano Gallogo Jr., atol sa pag-interview sa Juander Radyo News Team nga daghang aktibidad ang gilinya alang sa maong kasaulogan. Lakip niini ang float parade, tree planting activity, ug float pre-judging nga nahitabo sa unang adlaw sa selebrasyon.
Ilabi na ang Serbisyo Uban sa Gugma Caravan Daghang mga residente ang nakabenipisyo sa nagkalain-laing libreng serbisyo nga gitanyag, anaa na ang medical, dental, optical, legal assistance, civil registry, beauty and wellness services, ug uban pang mga programa nga nagtumong sa pagpauswag sa ilang panglawas ug kinabuhi.
Giklaro usab ni Gallogo nga ang opisyal nga anibersaryo sa Barangay Mainit ginasaulog matag Hunyo 18, apan gi-extend ang mga kalihokan hangtod Hunyo 21 aron maapil ang ubang programa nga wala masulod sa orihinal nga iskedyul.
Sa Hunyo 19, pagahimoon ang hip-hop dance competition nga gilauman pagatambongan sa nagkadaiyang grupo gikan sa lain-laing lugar. Samtang sa Hunyo 20, pagadumalahan ang motocross competition sa bakanteng lote duol sa Mainit National High School sugod alas-otso sa buntag, ug sundan dayon sa commercial basketball tournament sa katapusang adlaw maon ang announcemnet sa mga nidaug.
Samtang nagpadayon ang kasaulogan, gi-awhag ni Gallogo ang mga residente sa Barangay Mainit ug sa tibuok Nabunturan nga magpadayon sa pagsuporta sa mga kalihokan sa barangay.
Nagpasalamat usab siya sa mga lumulupyo alang sa ilang kooperasyon ug pagsalmot sa mga programa sa barangay, ingon man kang Mayor Myrocel Balili tungod sa padayon nga suporta ug paghatag og serbisyo alang sa katawhan sa Mainit.
Nagpadayon ang kasadya ug panaghiusa sa Barangay Mainit isip bahin sa pagsaulog sa ilang ika-71 nga anibersaryo.
