Nagpasalamat ang City Government of Digos ngadto kang Senador Christopher “Bong” Go human sa iyang pagdonar og 100 ka food packs alang sa mga pamilyang naapektuhan sa linog nga mitay-og sa pipila ka bahin sa Mindanao niadtong Hunyo 8, 2026.
Sumala sa City Disaster Risk Reduction and Management Office (CDRRMO) Digos, ang maong donasyon dakong tabang sa paghatag og agarang suporta ug kahupayan sa mga residente nga nakasinati og kalisod tungod sa maong kalamidad.
Gipahayag sa lokal nga panggamhanan nga ang pag-abot sa mga food packs usa ka timaan sa pagpakabana ug pagkahiusa sa panahon nga nagkinahanglan og tabang ang mga naapektuhang komunidad.
Ang maong ayuda makatabang sa pagtagbo sa panginahanglan sa mga pamilya samtang nagpadayon ang rehabilitasyon ug pagbangon gikan sa epekto sa linog.
Naghatag usab og pasalamat ang City Government of Digos pinaagi sa pagpanguna ni CDRRMC Chairperson ug Digos City Mayor Josef F. Cagas, uban sa CDRRMO Digos, alang sa walay hunong nga suporta ug malasakit nga gipakita ni Senador Go ngadto sa katawhang Pilipino, ilabina sa mga biktima sa mga kalamidad.
Padayon usab ang paningkamot sa lokal nga kagamhanan sa pagmonitor ug paghatag og tabang sa mga residente aron maseguro ang ilang kaluwasan ug kaayohan human sa maong linog.
