Nasikop sa kapulisan sa Tandag Component City Police Station (CCPS) ang usa ka wanted person ug usa ka gidudahang drug personality atol sa duha ka managlahing operasyon nga gihimo kagahapon, Hunyo 15, 2026.
Ubos sa pagdumala ni PLTCOL Junyd D. Marohom, Officer-in-Charge sa Tandag CCPS, una nga nasikop alas-9:00 sa buntag ang usa ka suspek nga giila lamang sa alyas nga “Mer,” 33 anyos, residente sa Barangay San Agustin Sur, Tandag City.
Gidakop siya sa Barangay Bongtud pinaagi sa warrant of arrest nga gi-isyu sa Regional Trial Court Branch 27 sa Tandag City tungod sa paglapas sa Section 68 sa Presidential Decree 705 o ang Forestry Reform Code of the Philippines, nga may kalabutan sa ilegal nga pagputol og kahoy. Gitakda sa korte ang piyansa sa kantidad nga P80,000 alang sa iyang temporaryong kagawasan.
Samtang alas-8:45 sa gabii sa maong adlaw, usa usab ka malampusong buy-bust operation ang gihimo sa Barangay Bag-ong Lungsod diin nasikop si alyas “Dongkoy,” 40 anyos, nga bag-ong natumbok nga drug personality.
Narekober gikan sa suspek ang gibanabana nga lima ka gramo sa gidudahang shabu nga adunay kantidad nga mokabat sa P34,000, lakip ang marked money ug uban pang ebidensyang may kalabutan sa ilegal nga droga.
Sa pagkakaron, giandam na sa kapulisan ang pagpasaka og kaso batok sa mga suspek tungod sa paglapas sa Republic Act 9165 o Comprehensive Dangerous Drugs Act of 2002 ngadto sa City Prosecutor’s Office.
Photo courtesy: Tandag City Police Station
