Dako nga kantidad sa gidudahang ilegal nga droga ug usa ka ilegal nga armas ang nasakmit sa kapulisan atol sa malampusong pagpatuman sa search warrant sa Purok 5, Barangay San Fernando, Bislig City niadtong gabii sa Hunyo 14, 2026.
Ang operasyon gihimo sa mga operatiba sa Bislig Component City Police Station ubos sa pagpanguna ni PLTCOL Jassen N. Tuario, Acting Chief of Police, kauban ang Provincial Intelligence Unit sa Surigao del Sur Police Provincial Office ug sa koordinasyon sa Philippine Drug Enforcement Agency (PDEA).
Giserbihan sa mga otoridad og Search Warrant No. 2026-0-FC-B nga giisyu sa Regional Trial Court Branch 46, Bislig City ang usa ka suspetsado nga nailhan sa alyas nga “Bon-bon,” 43 anyos, minyo ug walay trabaho, tungod sa giingong paglapas sa Republic Act 9165 o Comprehensive Dangerous Drugs Act ug Republic Act 10591 o Comprehensive Firearms and Ammunition Regulation Act.
Apan sa pag-abot sa mga operatiba, namatikdan sa suspetsado ang presensya sa kapulisan ug nakahigayon sa pag-ikyas pinaagi sa pag-ambak ngadto sa ngitngit ug kasagbotang dapit padulong sa wala mahibal-i nga direksyon. Tungod niini, padayon ang hot pursuit operation sa mga otoridad aron madakpan siya.
Atol sa paghalughog sa iyang pinuy-anan, nakarekober ang kapulisan og 42.23 gramos sa gidudahang shabu nga adunay gibanabanang kantidad nga ₱287,164.00 ug usa ka gramo sa gidudahang marijuana nga nagkantidad og ₱300.00.
Nasakmit usab ang nagkadaiyang drug paraphernalia lakip ang digital weighing scale, mga gunting, surgical blades, cellophane, improvised drug equipment, mga notebook nga adunay mga sinulat nga posibleng may kalabutan sa ilegal nga kalihokan, ug kantidad nga ₱1,500 nga kuwarta.
Dugang pa, nakumpiska usab ang usa ka Bersa Thunder .380 caliber pistol, usa ka magasin ug dose ka buok live ammunition nga walay naipakitang legal nga dokumento.
Ang imbentaryo ug pagmarka sa mga ebidensya gisaksihan sa mga representante gikan sa barangay, media ug Department of Justice, sumala sa gikinahanglan sa balaod.
Gidala ang tanang nasakmit nga ebidensya ngadto sa Bislig Component City Police Station alang sa hustong dokumentasyon ug disposisyon samtang nagpadayon ang imbestigasyon sa kaso.
Photo courtesy: PNP BISLIG
