Opisyal nga gilunsad sa Bangko Sentral ng Pilipinas (BSP) ug Department of Trade and Industry (DTI) ang implementasyon sa PalengQR Ph Plus sa lain-laing syudad ug probinsya sa Pilipinas.
Ang maong programa nagtumong sa pagpasiugda sa digital payments pinaagi sa usa ka unified QR code system nga magamit sa mga public market vendors, small businesses, ug mga konsumidor aron mas mapadali ug mas mapalambo ang cashless transactions.
Sumala sa mga opisyal, ang PalengQR Ph Plus usa ka dako nga lakang sa digital transformation sa lokal nga ekonomiya, ilabi na sa mga merkado nga kasagarang nagdepende pa sa cash.
Pinaagi niini, ang mga tindera ug negosyante makalikay sa risgo sa pagpangawat ug mas sayon ang pag-monitor sa ilang kita, samtang ang mga pumapalit makabaton og mas luwas ug kombenyenteng paagi sa pagbayad gamit ang QR code pinaagi sa mobile banking o e-wallet applications.
Gilauman sa gobyerno nga pinaagi sa padayon nga rollout sa PalengQR Ph Plus, mas daghan pang mga lokal nga merkado sa tibuok nasud ang maapil sa digital payment system. Kini usab gitan-aw nga makapalig-on sa transparency sa negosyo ug makapadasig sa mas daghang micro, small, and medium enterprises (MSMEs) nga mosulod sa modernong sistema sa pinansyal nga transaksyon.
Photo Courtesy : LGU-Tagum
