Nisaka na sa 45 ang gidaghanon sa mga namatay tungod sa magnitude 7.8 nga linog nga miigo sa pipila ka bahin sa Mindanao niadtong Lunes, sumala sa National Disaster Risk Reduction and Management Council (NDRRMC).
Sa ulahing datos sa ahensya, 33 sa mga namatay gikan sa SOCCSKSARGEN ug 12 gikan sa Davao Region. Naitala usab ang 487 ka mga naangol ug 17 pa ka mga tawo ang gikatahong nga nawagtang, bisan pa nga padayon pang gipasuta ug gipamatud-an sa mga otoridad ang maong mga numero.
Mokabat sa 149,372 ka mga indibidwal o 33,596 ka pamilya ang naapektuhan sa linog sa Zamboanga Peninsula, Davao Region, SOCCSKSARGEN ug BARMM. Niana, kapin 32,000 ka mga residente ang nagpabilin sa mga evacuation center.
Giingon sa Office of Civil Defense (OCD) nga naabot na sa mga responder sa gobyerno ang kadaghanan sa mga lugar nga una nga nahimulag tungod sa kadaot sa mga dalan ug taytayan. Apan, nagpabilin nga hagit ang pag-access sa ubang komunidad ilabina sa SOCCSKSARGEN.
Base sa inisyal nga report sa Department of Public Works and Highways (DPWH), 18 ka taytayan ug 41 ka mga dalan ang nadaot sa linog, diin pipila niini dili na maagian. Naitala usab ang unom ka insidente sa pagdahili sa yuta.
Padayon karon ang pag-apod-apod sa gobyerno og pagkaon, tolda, sugnod ug uban pang mga ayuda alang sa mga pamilyang naapektuhan sa maong kalamidad.
Photo Courtesy: GMA News
