Gipasalig sa bag-ong hepe sa Tandag City Police Station (CPS) nga padayon nilang palig-onon ang kampanya batok sa kriminalidad aron masiguro ang kaluwasan ug kalinaw sa dakbayan sa Tandag.
Sa eksklusibong pakighinabi sa Juander Radyo News Team, gibutyag ni Police Lieutenant Colonel Junyd D. Marohom nga usa sa iyang mga prayoridad isip bag-ong hepe sa Tandag CPS mao ang pagpakusog sa anti-criminality campaign sa kapulisan ug pagpalapad sa mga programa nga makatabang sa pagmintinar sa kalinaw ug kahapsay sa komunidad.
Matud ni Marohom, ilang padayon nga pakusgan ang mga police operation ug pagmonitor sa mga lugar aron malikayan ang mga kalapasan sa balaod ug mapanalipdan ang mga residente sa siyudad.
Gipasiugda usab sa opisyal ang kamahinungdanon sa kooperasyon sa publiko aron mahimong mas epektibo ang mga kalihokan sa kapulisan.
Naglaom ang Tandag CPS nga pinaagi sa lig-on nga panagtinabangay sa kapulisan ug katawhan, magpabiling luwas ug malinawon ang Dakbayan sa Tandag alang sa tanang mga residente ug bisita.
