Giawhag sa Office of Civil Defense (OCD-9) ang publiko nga seryosohon ang paghimo ug evacuation drills ug uban pang disaster preparedness activities aron magamit sa tukma kon masinati ang kusog nga linog sa Zamboanga Peninsula.
Matod ni OCD 9 Regional Director Atty. Ruel S. Halanes, usa sa ilang dakong hagit mao ang paghatod sa hustong impormasyon ngadto sa komunidad ug sila nagkinahanglan ug kooperasyon sa mga lokal nga lider aron mas mapalig-on ang pagpangandam sa kalamidad.
Pagpasabot ni Atty. Halanes, ang tinuod nga kahulogan sa preparedness dili lang kay kutob sa pagbansay, kondili ang ug pag-aplikar niini sa katawhan kon adunay emerhensiya susama sa linog nga nahitabo ning bag-o dinhi sa rehiyon.
Gipasiugda usab niya nga ang evacuation drills dili angay tan-awon nga ordinaryong kalihokan o himuong content alang sa social media, kay usa ka seryosong pagbansay ang pagluwas sa kinabuhi panahon sa katalagman.
Tungod niini, padayon nga giawhag sa Atty. Halanes ang tanang residente nga aktibong moapil ug mosunod sa mga evacuation drill aron mas andam ug mas luwas ang komunidad sa bisan unsang mga katalagman.
