Gipalig-on sa Cebu City Veterinary Medicine and Fisheries Office ang ilang kampanya sa mass vaccination human sa pagsaka sa mga kaso sa animal rabies ug pagkunhod sa suplay sa bakuna. Matod ni City Veterinarian Dr. Jessica Maribojoc nga nakatala na ang syudad og 15 ka kumpirmadong kaso sa animal rabies karong tuiga.
Sa pagtandi, miabot sa 31 ka kaso sa animal rabies ang natala niadtong 2025. Gipahinumdoman usab sa mga awtoridad nga usa sa labing taas nga natala nga kaso sa miaging mga tuig ang 2024 diin nakarecord og 32 ka kaso human mapakyas ang pagkab-ot sa target nga ihap sa mga hayop nga mabakunahan.
Bisan pa sa pagsaka sa mga kaso sa rabies sa mga hayop, wala pay natalang kamatayon sa tawo tungod sa rabies karong tuiga.
Apan, usa ka senior citizen ang namatay bag-ohay lang human matakdan og rabies gikan sa pinaakan sa iro nga nahitabo niadtong Oktubre sa miaging tuig ug wala makadawat og post-exposure vaccination.
Samtang nagpadayon ang kampanya sa pagbakuna ug nagkadaghan ang mga tag-iya sa mga binuhi nga nagpadangat sa ilang mga hayop alang sa immunization, giatubang usab sa syudad ang kakulang sa suplay sa bakuna.
Gihingusgan ni Maribojoc nga ang pagkontrolar sa rabies gikan sa gigikanan niini, ilabina sa mga iro, mao gihapon ang labing epektibo ug labing barato nga paagi aron malikayan nga motakod ngadto sa mga tawo.
Sumala sa mga opisyal sa panglawas, ang grabeng kaso sa exposure sa rabies mahimong magkinahanglan og active ug passive anti-rabies vaccines, diin ang gasto sa pagtambal mahimong moabot hangtod sa ₱30,000 matag pasyente.
Padayon nga giprayoridad sa mga awtoridad ang mass vaccination sa mga iro aron mapugngan ang pagkatap sa rabies, malikayan ang kamatayon sa tawo, ug maminusan ang mahal nga gasto sa medikal nga pagtambal.
Photo courtesy: Cebu City Government-Department of Veterinary Medicine and Fisheries
