Patay ang usa ka pasahero samtang duha ang naangol human sa usa ka karambola nga naglambigit sa lima ka sakyanan sa National Highway, Purok 1, Barangay Rang-ay, Banaybanay, Davao Oriental alas 7:12 sa buntag Hunyo 8, 2026.
Ang namatay giila nga si Emmanuel G. Madriaga, 38-anyos, miyembro sa Armed Forces of the Philippines (AFP) ug residente sa Barangay Nangan, Governor Generoso.
Siya ang pasahero sa usa ka Suzuki Multicab nga naapil sa aksidente. Gidala pa siya sa Davao Oriental Provincial Hospital sa Lupon apan gideklarar nga dead on arrival.
Base sa inisyal nga imbestigasyon sa Banaybanay Municipal Police Station, ang multicab padulong sa Davao City kalit nga misulod sa pikas lane ug mibangga sa likod nga bahin sa usa ka Toyota Hilux nga padulong sa Lupon. Tungod sa kusog sa impact, nabanggaan usab niini ang usa ka Mitsubishi Xpander.
Sa samang higayon, usa ka Toyota Veloz nga naningkamot paglikay sa nahitabong bangga, nabangga gihapon sa kilid sa laing Toyota Hilux nga gimaneho ni Jose Amor C. Bagayas.
Naangol usab si Geronico Arlalejo Dulzura, drayber sa usa sa mga Hilux, ug si Bagayas nga gidala sa ospital alang sa atensyong medikal.
Samtang padayon pa ang imbestigasyon sa kapulisan, aron matino ang hingpit nga hinungdan sa aksidente, samtang nagpahimangno ang mga otoridad sa tanang mga biyahero nga mag-amping kanunay sa kadalanan.
