Boluntaryong misurrender ngadto sa mga awtoridad ang usa ka kanhi miyembro sa Communist Terrorist Group (CTG) nga giila sa alyas “Bornok,” 30 anyos, minyo ug residente sa Zone II, Barangay Lonoy, Kananga, Leyte didto sa Barangay Cristina, Calubian, Leyte kagahapong adlawa, Agosto 31, 2026.
Sumala sa kapulisan, nahimo ang iyang pagsurender pinaagi sa padayong pakig-istorya, dayalogo ug koordinasyon sa mga operating unit aron awhagon siya sa pagbiya sa maong grupo, pagbalik sa legal nga pamaagi sa kinabuhi ug pagpangita og malinawon nga pagpuyo sa komunidad.
Atol sa iyang pagsurender, boluntaryo niyang giturn-over ngadto sa mga awtoridad ang usa ka .38 caliber revolver nga walay serial number ug markings, upat ka bala, ug usa ka hand grenade. Ang mga armas ug bala gipailalom usab sa hustong dokumentasyon ug proseso alang sa tukmang disposisyon.
Ang maong inisyatibo kabahin sa pamaagi sa gobyerno nga nagpalig-on sa whole-of-nation approach ubos sa Executive Order No. 70, nga nagtumong sa pagdasig sa mga miyembro sa armadong grupo nga mobiya sa armadong pakigbisog ug makabalik sa malinawon nga pagpuyo sa komunidad. Ang surrenderer anaa karon sa kustodiya sa 2nd LPMFC alang sa dokumentasyon, debriefing ug pagproseso ubos sa mga programa sa gobyerno alang sa reintegrasyon.
Photo Courtesy: PNP LPPO
