Gipahibalo ni Cebu Governor Pamela Baricuatro ang lig-ong panawagan alang sa accountability ug integridad sa mga opisyal, empleyado, kontraktor ug suppliers sa Kapitolyo atol sa iyang ikaduhang State of the Province Address kun SOPA niadtong Lunes Agosto 31, 2026.
Matud ni Baricuatro nga ang matag pirma sa mga opisyal ug empleyado nagdala og responsibilidad sa mga desisyon nga ilang giaprobahan, samtang iyang giawhag ang mga kontraktor ug suppliers nga makigkompetensya sa patas nga paagi ug motuman sa ilang mga obligasyon.
Gidasig usab sa gobernador ang mga Sugbuanon nga magpabiling mabinantayon pinaagi sa pagpangutana, pagpangayo og mga rekord sa gobyerno ug pagsusi sa mga proyekto ug trabaho sa provincial government.
Gipahinumdoman ni Baricuatro nga ang korapsyon dili lamang pagpangawat og kuwarta, kondili pagpangawat usab sa tambal sa masakiton, classroom sa mga bata, panginabuhi sa mga kabus ug proteksiyon sa mga pamilyang anaa sa peligro.
Gipasalig ni Baricuatro nga magpadayon ang iyang administrasyon sa pagpatuman sa mga lakang batok sa korapsyon, samtang matud niya nga “Ang Kapitolyo dili negosyo. Ang Kapitolyo Serbisyo.”
Photo courtesy: Cebu Province
