Napahigayon ang Inter-Agency High Impact, High Visibility Inspection Program sa Department of Labor and Employment o DOLE Davao de Oro Field Office sa mga construction site ug usa ka grupo nagsusi sa pagtukod (pagkumpleto) sa Multi-Purpose Building (Hall of Justice) nga nahimutang sa Provincial Capitol area sa Barangay Cabidian, Nabunturan, samtang ang usa ka grupo nagsusi sa pagtukod sa usa ka lima ka andana nga administratibo/akademikong bilding nga adunay traynta ka lawak-klasehanan sa Davao de Oro State College (DDOSC) Compostela Main Campus sa Compostela sa nasampit nga probinsya niadtong Hunyo 9, 2026.
Gipangunahan ang maong kalihukan ni Senior Labor Employment Officer ug Labor Inspector Isidrick Paqueo ubos sa pagdumla ni Provincial Director Neil Allan R. Baban ug matod pa niya atol sa pag-interview sa Juander Radyo News Team nga ang maong inspeksyon nakig-uban ang mga ahensya sama sa Department of Public Works and Highways (DPWH) Regional Office XI, DPWH 1st ug 2nd District Engineering Offices, Bureau of Fire Protection (BFP), Technical Education and Skills Development Authority (TESDA) Davao de Oro, Municipal Engineering Offices sa Nabunturan ug Compostela, Social Security System (SSS), Pag-IBIG Fund, Philippine Health Insurance Corporation (PhilHealth), ug Department of Science and Technology (DOST) Davao de Oro.
Sumala sa DOLE, ang programa gihulagway isip usa ka “service caravan” diin ang mga serbisyo sa gobyerno mismo ang gidala diretso sa mga construction site aron maabot ang mga trabahante ug mga kontraktor.
Pasabot niini nga gitinguha sa gobyerno nga masiguro ang husto nga implementasyon sa labor standards, lakip ang sweldo, benepisyo, ug oras sa trabaho, ug ang pagsunod sa occupational safety and health protocols aron mapanalipdan ang kaluwasan sa mga mamumuo.
Gipasabot pa nga pinaagi sa presensya sa daghang ahensya, mas masuta ang tibuok kondisyon sa trabahoan ug masigurong kompleto ang serbisyo nga kinahanglan sa mga trabahante.
Gilaraw usab sa DOLE nga ang maong programa makatabang sa pag-align sa mga regulasyon sa nagkalain-laing ahensya sa gobyerno aron mas sayon ug mas hapsay alang sa mga kontraktor ang pag-comply sa mga kinahanglanon.
