Nabatyagan sa mga residente sa lungsod sa Nabunturan ang kusog nga linog nga miigo sa dakong bahin sa Mindanao buntag sa Hunyo 8, 2026. Tungod sa kakusog sa pagtay-og, daghang mga residente ang migawas sa ilang mga panimalay ug establisyemento aron masiguro ang ilang kaluwasan.
Apil usab sa naapektuhan ang mga tulunghaan ilabina nga mao ang unang adlaw sa pagbalik sa klase sa mga estudyante.
Gituyok sa Juander Radyo Nabunturan News Team ang nagkadaiyang mga tulunghaan aron masuta ang kahimtang human sa linog. Usa sa ilang gibisita ang Nabunturan Central Elementary School SPEED Center sa Davao de Oro.
Sa pakighinabi sa News Team kang Kishen Hena B. Gabiana, Administrative Assistant II ug DRRM Focal Person sa maong tunghaan, iyang gipadayag nga diha-diha silang nagpahigayon og assessment ug monitoring sa mga estudyante aron malikayan ang panic ug masiguro ang ilang kaluwasan panahon sa emerhensya.
Dugang pa ni Gabiana, wala’y naitalang insidente o kaswalti sa maong eskwelahan human sa linog. Giawhag usab niya ang publiko nga magpabiling alerto, mag-amping sa tanang higayon, ug likayan ang pagtuo ug pagpakaylap sa mga balitang walay kasiguruhan o walay kamatuoran may kalabutan sa nahitabong linog.
Padayon sa pagmonitor ang mga otoridad sa kahimtang samtang ginasusi pa ang posibleng mga epekto sa maong kusog nga linog sa ubang bahin sa rehiyon.
