Nakaangkon ug samad bun-og sa lawas ang tulo ka mga indibiwal human nga natagak sa pangpang ang ilang gisakyang sakyanan didto sa National Highway, Purok 5, Brgy. Iba, San Isidro, Davao Oriental pasado alas 10:35 sa buntag niadtong Hunyo 06, 2026.
Base sa report, giila ang driver sa sakyanan nga si alyas ”Ariel”, 32-anyos, minyo, usa ka seaman ug residente sa Padada, Davao del Sur kauban ang laing duha ka sakay niini.
Subay sa imbestigasyon sa mga otoridad, nasayran nga nahitabo ang maong pagkahulog sa dihang nasaghiran sa usa ka trailer truck ang likod nga bahin sa naasoy nga sakyanan nga nagresulta sa pagkawala sa kontrol sa drayber. Human niini, ang mga biktima daling gidala sa Lupon Hospital alang sa medikal nga pag-atiman.
Sa pagkakaron ang driver sa maong truck nga si alyas ”Nato”, 44-anyos, minyo nga residente sa Davao City anaa na sa kustodiya sa kapulisan alang sa tukmang disposisyon ug dugang imbestigasyon.
Photo Courtesy: Ricky Alcoma
