Nagpabiling igo ug stable ang suplay sa karne sa baboy sa Rehiyon 9, bisan pa sa mga hagit nga giatubang sa mga local hog raisers sa Zamboanga Peninsula.
Kini subay sa gipahayag ni Regional Director Dr. Rudio Abulencia sa National Meat Inspection Service Regional Technical Operations Center IX, atol sa pakighinabi sa Juander Radyo News Team.
Kahibaloan, nga hugot nga gipatuman ang pagpasulod ug karneng baboy ang syudad sa Zamboanga gikan sa pipila ka mga munisipalidad sa Zamboanga Sibugay gumikan sa epekto sa African Swine Fever (ASF).
Niini, malaumon si Dr. Abulencia, nga kon ma-lifted na ang ban sa maong mga lugar mas manumbalik pa ang lig-on nga suplay sa karneng baboy.
Sa pagkakaron, nagpabiling lig-on ang presyo sa karne sa baboy sa mga pampublikong merkado ug uban pang mga meat sellers sa Rehiyon 9.
Samtang, giawhag usab ang publiko nga mopalit lamang sa mga otorisadong merkado aron masiguro ang kalidad ug kaluwasan sa ilang mapalit nga produkto.
