Nagpadayon ang Digos City Government sa test run sa CDFRB/CMO App, usa ka bag-ong digital system nga gidesinyo aron mapahugtan ang monitoring sa mga tricycle units ug masiguro nga ang tanan nag-operate kay lehitimo ug adunay valid nga MTOP o franchise.
Ang maong aplikasyon makatabang sa pag-ila sa peke o duplicate nga body numbers, pag-detect sa mga illegal nga nag-operate nga walay prangkisa, ug pag-verify kung ang franchise sa usa ka operator kay valid, expired, o inactive.
Sumala sa lokal nga kagamhanan, pinaagi sa sistema makita dayon kung ang usa ka tricycle unit tinuod ba ug rehistrado, ug kung hangtod kanus-a ang validity sa ilang franchise.
Atol sa demonstration sa app, gipakita sa mga opisyal kung giunsa pag-check sa sistema ang mga tricycle records ug franchise validity. Lakip sa gipakita ang pag-verify sa status sa usa ka operator nga adunay valid nga prangkisa hangtod sa umaabot pa nga tuig, nga nagpamatuod sa transparency sa bag-ong sistema.
Gipatin-aw usab nga ang CDFRB/CMO App makatabang sa mas episyente nga regulasyon sa public transport pinaagi sa tukmang database ug real-time verification sa mga units.
Samtang sa pikas nga bahin, gipahibalo sa Digos City Government, nga gihatagan og duha ka bulan nga grace period ang mga tricycle operators ug drivers nga adunay expired o wala pa marenew nga MTOP o franchise.
Sulod niini nga panahon, gidasig sila sa pag-comply ug pag-renew sa ilang mga permit imbes nga dayon hatagan og citation tickets o penalties.
Apan gipahimangno usab nga human sa duha ka bulan, mahimong mas istrikto na ang implementasyon, lakip na ang posibleng double penalties ug pagpatuman sa citation tickets batok sa mga dili mosunod sa regulasyon.
