Bisan pa sa ilang komplikado nga panagbulag, giingon ni Miss Universe 2018 Catriona Gray nga andam siya sa posibilidad nga makatrabaho pag-usab ang iyang kanhing fiancé nga si Sam Milby, kon adunay proyekto nga angay alang nilang duha.
Atol sa usa ka media interview sa “Petals & Poetry” fashion show, diretsahang gipangutana si Catriona kon andam ba siyang makigtrabaho pag-usab sa aktor ug singer.
Nagkakuyog sila ni Sam sulod sa pipila ka tuig ug mipahibalo sa ilang engagement niadtong Pebrero 2023. Apan niadtong Pebrero 2025, gikumpirma ni Sam nga nagbulag na sila, bisan wala siya mohatag og dugang detalye ug nagpili nga magpabiling pribado ang ilang personal nga kahimtang.
Niadtong Pebrero 2026, sa usa ka vlog interview, gibutyag ni Catriona nga nasakitan siya sa nahitabo sa ilang relasyon. Sumala kaniya, pipila lamang ka bulan human sa proposal, miingon si Sam nga dili pa siya andam alang sa kaminyoon. Giangkon ni Catriona nga dako ang epekto niini sa iyang emosyon ug usa kini sa labing lisod nga yugto sa iyang kinabuhi.
Sa laing bahin, niingon si Sam nga natingala siya sa paghisgot ni Catriona sa pipila ka detalye sa ilang panagbulag apan nagpadayon gihapon siya sa iyang baruganan nga pribadohon ang maong isyu ug dili na magkomento pa.
Human sa ilang panagbulag, parehong nagpadayon ang duha sa ilang tagsa-tagsa ka karera. Si Catriona misulod sa pag-arte pinaagi sa pelikulang “The Loved One”, diin nakadawat siya og positibong mga komento bisan mubo lamang ang iyang papel. Gikumpirma usab niya nga adunay laing pelikula nga iyang giandam ug nagtrabaho usab siya sa mga proyekto sa fashion ug musika.
Samtang si Sam nagpadayon sa iyang mga proyekto sa telebisyon, pelikula ug musika. Nagpabilin usab siyang aktibo sa industriya sa kalingawan ug nagpokus sa iyang personal ug propesyonal nga kalamboan.
Bisan pa sa ilang nangaging relasyon, ang pahayag ni Catriona nagpakita nga wala niya isira ang posibilidad sa propesyonal nga pakigtambayayong sa umaabot, basta ang proyekto adunay hustong konsepto ug angay alang kaniya isip artista ug personalidad.
PHOTO COURTESY:fashion Pulis
