Nakadani og atensyon ang usa ka grocery chain nga E-Mart sa South Korea, human maglunsad sa ilang “one-a-day” banana packs, usa ka talagsaong konsepto aron maminusan ang pagka-usik sa mga saging nga dali kaayong ma-over ripe.
Kahibaloan ang pakete adunay unom ka saging nga lain-laig klasi sa pagkahinog. Adunay hinog na nga pwede dayon kan-on, adunay medyo hinog-hinog lang, ug adunay green pa aron magamit sa mosunod nga mga adlaw. Pinaagi niini, mas sayon kuno para sa mga konsumidor nga mahurot ang mga saging sa hustong panahon ug malikayan ang paglabay sa sobra ka hinog nga prutas.
Daghang tawo ang midayeg sa maong ideya tungod kay makatabang kini sa pagpakunhod sa food waste, usa sa mga dagkong problema sa daghang nasud. Apan adunay mga kritiko nga mipahayag og kabalaka tungod sa dugang nga plastic packaging nga gigamit sa produkto.
Matod sa uban, adunay natural nga panalipod ang saging pinaagi sa iyang panit, busa dili na kinahanglan ang sobra nga plastik aron lang mailhan ang lebel sa pagkahinog. Aduna usab miingon nga mahimo ra unta nga mopalit ang mga konsumidor og sagol nga hinog ug hilaw nga saging aron makab-ot ang maong tumong.
Bisan pa sa debate, ang maong inisyatiba nagpakita kung giunsa sa pipila ka kompanya ang pagpangita og bag-ong paagi aron mapakunhod ang pag-usik sa pagkaon, samtang gitimbang-timbang usab ang epekto niini sa kalikupan.
Photo Courtesy: x.com
