Gipasidaan sa Department of Labor and Employment (DOLE) Zamboanga del Sur ang mga benepisyaryo nga nidawat sa livelihood kits nga mahimo nilang bawi-on o ipauli kini kon mapamatud-an nga wala gigamit alang sa gitumong nga panginabuhian.
Matod sa DOLE Zamboanga del Sur Provincial Director Miraflor Casanes, kabahin sa ilang gipirmahan nga porma nga mahimo nilang kuhaon ang mga kits kon dili nila mapahimuslan sa husto aron mahatag kini sa ubang nagkinahanglan ug mga livelihood assistance.
Gidugang niya, nga ang mga benepisyaryo nga mga parolees ug probationers adunay responsibilidad sa pagpadagan ug pagpalambo sa ilang gipili nga panginabuhian gamit ang mga kits nga ilang nadawat.
Pinaagi sa regular nga pagmonitor, masuta sa DOLE Zamboanga del Sur nga nagpadayon ba ang mga livelihood projects aron makatabang sa paghatag og dugang kita sa mga pamilya sa mga benepisyaryo.
Samtang, nag-awhag usab si PD Casanes sa mga nakadawat sa maong programa nga ampingan ug gamiton sa husto ang mga kagamitan aron mapadayon ang ilang panginabuhian ug malikayan ang posibilidad nga mabawi kini sa gobyerno.
