Opisyal nang gidawat sa Dakbayan sa Sugbo ang “Mabuhi Gesture” isip standard nga paagi sa pagpangumusta sa mga frontline public service offices human maaprobahan ang Resolution No. 17-3778-2026 nga giduso ni Cebu City Councilor Nice Archival sa Konseho sa Dakbayan sa Sugbo atol sa regular nga sesyon.
Giila sa resolusyon ang “Mabuhi Gesture,” nga gihimo pinaagi sa pagbutang sa tuo nga kamot ibabaw sa wala nga dughan uban sa gamay nga pagyukbo sa ulo, isip simbolo sa pagkamaabi-abihon sa mga Pilipino, garbo sa kultura, ug pagrespeto sa isigkatawo.
Ubos sa maong resolusyon, ang “Mabuhi Gesture” gamiton isip opisyal nga pamaagi sa pagpangumusta ug pagpakita og pagkamaabiabihon sa tanang opisina sa kagamhanan sa Dakbayan sa Sugbo.
Giawhag usab ang mga empleyado nga nakaassign sa Public Assistance and Complaints Desk (PACD) ug uban pang kawani nga direktang nakig-atubang sa publiko nga gamiton kini sa ilang adlaw-adlaw nga transaksiyon.
Ang maong lihok unang gipaila sa panahon sa Filipino Brand of Service Excellence (FBSE) Seminar nga gihimo sa Cebu City Tourism Office sa pakigtambayayong sa Department of Tourism (DOT).
Ang maong lakang nahiuyon usab sa Republic Act No. 11032 o ang Ease of Doing Business and Efficient Government Service Delivery Act of 2018, nga nag-awhag sa mga ahensya sa gobyerno sa paghatag og episyente ug customer-friendly nga serbisyo ngadto sa publiko.
Photo courtesy: Philippine News Agency
