Balhog sa prisohan ang usa ka habal-habal driver human kining nasakmitan sa iligal nga drugang shabu pinaagi sa gipahigayon nga search warrant implementation sa Purok Buli, Barangay Minaog, Dipolog City niadtong milabayang adlaw.
Giila ang dinakpan nga si alyas Bentoy, 47-anyos ug residente sa nasangpit nga dapit.
Giimplementar sa mga personahe sa the Dipolog City Police Station Drug Enforcement Team ang maong operasyon kauban ang Regional Drug Enforcement Unit 9 (RDEU9, 5th Special Operations Unit–Maritime Group, ug PDEA Region 9.
Nakuha gikan sa posisyon sa suspetsado ang 1 ka dako ug 2 ka gamay nga pakete sa shabu nga motimbang ug 3 ka gramo ug nagkantidad ug Php20,400.00.
Dugang nasakmit gikan sa dinakpan ang 1 ka black leather wallet nga gisudlan sa droga, 6 ka empty transparent plastic sachet, disposable lighters ug uban pang mga non-drug items.
Gi-turnover ngadto sa the Zamboanga del Norte Provincial Forensic Unit ang mga narecover nga druga alang sa laboratory examination samtang ang dinakpan gikustudiya sa Dipolog City Police Station alang sa tukmang disposisyon.
