Patay ang usa 41-anyos nga kanhing kapitan sa Upper Sang-an, Labangan, Zamboanga del Sur human gipusil sa wala mailing mga suspetsado sakay sa usa ka Toyota Fortuner nga nahitabo sa Purok Sampaguita, Barangay Tawagan Sur, Pagadian City, Huwebes sa hapon niadtong nakalabay nga adlaw.
Base sa imbestigasyon, sakay ang biktima sa iyang Yamaha Mio 125 nga motorsiklo ug paingon unta sa usa sa mga hospital sa syudad sa Pagadian aron kuhaon iyang asawa nga nagtrabaho isip usa ka nurse sa diha nisunod kaniya ang Toyota Gray Fortuner.
Kalit lang dayong nadungog ang sunod-sunod nga buto sa pusil nga miresulta sa hinanaling kamatayon sa biktima ug na-recover sa crime scene ang tulo ka basiyo sa 9mm pistol.
Gilusad usab dayon sa kapulisan ang CCTV backtracking ug forensic examination aron mahibal-an ang motibo sa pagpamusil ug mailhan ang mga responsable sa kremin.
Samtang, gikuha ra usab dayon sa kabanay ang patay’ng lawas sa biktima aron kini mapahiluna sa katapusang pahulayanan subay sa tinuohang Islam.
Sa gihimong dragnet operation, malampuson ra usab nga na-on hold sa kapulisan ang sakyanan nga gigamit sa mga suspetsado sa kremin sa Purok Bungtod, Poloyagan, Pagadian City mga alas 6 sa gabie, sa samang adlaw.
Gipasalig usab sa Zamboanga del Sur Police Provincial Office nga ilang gihimo ang tanang pamaagi aron masulbad dayon ang insidente.
Naghangyo usab ang kapulisan sa publiko nga adunay impormasyon kabahin sa insidente nga makigtambayayong aron mas paspas nga masulbad ang kaso.
Photo Courtesy: ZSPPO PRO-9
