Patay ang usa ka 46-anyos nga construction worker human gipusil sa usa ka 32-anyos nga gold miner kagahapon sa buntag, Mayo 28, 2026, sa may Barangay Sibuguey, Lakewood, Zamboanga del Sur.
Base sa imbestigasyon sa kapulisan, giduol una sa suspetsado ang menor de edad nga apo sa biktima ug niingon nga pwedi nang makuha na sa iyang apohan ang iyang sweldo sa usa ka vulcanizing shop sa maong lugar.
Apan pag-abot sa biktima, kalit kining gipusil sa suspetsado gamit ang caliber .45 nga armas ug naigo sa ubos nga bahin sa tiyan. Gidala dayon ang biktima sa Lakewood Rural Health Unit apan gideklarar kining dead on arrival sa attending physician.
Narecover sa crime scene ang duha ka fired cartridge cases ug usa ka bala sa caliber .45 nga armas. Gibutyag usab sa imbestigasyon nga posibleng personal nga kasuko ug daang panaglalis samtang hubog maoy motibo sa krimen.
Human sa insidente, misibat dayon ang suspetsado ngadto sa wala hisayreng direksyon.Samtang, padayon karon ang hot pursuit ug dragnet operation sa Lakewood MPS uban sa mga kasikbit nga estasyon sa pulis aron madakpan ang suspetsado ug mapapanubag kini sa iyang salaod.
Photo Courtesy: ZSPPO PRO-9
