Nadakpan sa mga otoridad ang usa ka High-Value Individual (HVI) ug nasakmit ang gibanabana nga ₱136,000 nga kantidad sa gidudahang shabu atol sa gilusad nga buy-bust operation sa Tandag City niadtong Miyerkules sa gabii, Mayo 27, 2026.
Giila sa Surigao del Sur Police Provincial Office (SDSPPO) ang nadakpan nga si alyas “Gene/VIP,” 26-anyos, lumulupyo sa Purok Punta, Barangay Telaje, Tandag City. Siya giila isip watchlisted nga pusher ug gi-categorize isip High-Value Individual.
Gipahigayon ang operasyon mga alas 6:50 sa gabii sa Purok Tabing Dagat, Barangay Mabua, Tandag City. Kini bunga sa Target Intelligence Packet (TIP) ug sa koordinasyon sa Philippine Drug Enforcement Agency (PDEA). Ang operasyon gipangunahan sa mga personnel sa SDS Police Drug Enforcement Unit (PDEU), Tandag City Component Police Station, ug PDEA Surigao del Sur Provincial Office.
Sa kalampusan sa operasyon, narekober gikan sa suspetsado ang mosunod nga ebidensya:
Upat (4) ka heat-sealed plastic sachet nga adunay gidudahang shabu nga may gibug-aton nga mga 20 gramos, nga nagkantidad og mga ₱136,000
Usa (1) ka ₱1,000 nga buy-bust money nga adunay serial number 0253524
Napulo (10) ka tinuod nga ₱1,000 bills ug kwarentay (40) ka ₱100 bills nga nagkantidad og ₱14,000
Usa (1) ka Oppo Android cellphone Uban pang drug paraphernalia sama sa cellophane, itom nga coin pouch, ug gray sling bag
Ang inventory ug body search gihimo sa hapsay nga paagi, nga gitambongan sa usa ka kagawad sa Barangay Mabua, representante sa Department of Justice (DOJ), ug media representative. Gisiguro usab sa mga otoridad nga nasunod ang hustong proseso ug gipahibalo ang suspetsado sa iyang mga katungod ilawom sa balaod.
Gidayeg ni Police Colonel Jeffrey Lawrence D. Mauricio ang operasyon ug ang panaghiusa sa mga nagpatuman niini.
Sumala kaniya, dako kini nga hampak sa lokal nga drug network sa Tandag City ug nagpakita sa kusog nga intelligence-driven nga kampanya sa kapolisan kauban ang PDEA ug komunidad.
Ang suspetsado ug ang mga nakumpiskang ebidensya gidala sa Tandag City Component Police Station alang sa tukmang dokumentasyon ug giandam na usab ang pagsang-at sa kaso batok sa suspetsado ilawom sa Republic Act 9165 o Comprehensive Dangerous Drugs Act of 2002.
Photo courtesy: SDSPPO
