Nabungkag ang usa ka gidudahang drug den ug tulo (3) ka indibidwal ang nadakpan sa gilusad nga buy-bust operation sa Purok 6, Felings Village, John Bosco District, Barangay Mangagoy, Bislig City, niadtong Huwebes sa kaadlawon, Mayo 28, 2026.
Ang operasyon gipahigayon pasado alas 1:15 sa kaadlawon pinaagi sa hiniusang pwersa sa Philippine Drug Enforcement Agency (PDEA) Regional Intelligence Division, PDEA Surigao del Sur Provincial Office, ug Bislig City Police Station, nga misangpot sa pagkabungkag sa giila nga drug den sa maong lugar.
Lakip sa nadakpan mao ang usa ka giila nga drug den maintainer ug duha ka bisita niini.
Sa operasyon, narekober sa mga otoridad ang gibanabana nga lima ka gramo sa gidudahang shabu nga adunay standard drug price nga mokabat sa ₱34,000. Lakip usab niini ang buy-bust item ug uban pang sachet nga gituohang para sa ilegal nga pagbaligya.
Nasakmit usab ang nagkadaiyang drug paraphernalia, usab ang buy-bust money nga nagkantidad og ₱1,000 nga adunay serial number, ug 19 ka peke nga ₱1,000 nga gigamit sa poseur buyer atol sa operasyon.
Ang tulo ka suspek atubang sa kasong paglapas sa Sections 5, 6, 11, ug 12, Article II sa Comprehensive Dangerous Drugs Act of 2002.
Photo courtesy: PDEA 13
