Gianunsyo sa Pag-IBIG Fund nga ilang gipataas ngadto sa ₱10 million ang maximum housing loan aron mas daghan pang miyembro ang makapalit og balay o condominium, labi na sa mga syudad sama sa Metro Manila.
Sumala sa Pag-IBIG, daghan pa karon og bakanteng condominium units nga wala mapalit. Tuyo sa gobyerno nga mapadali ang pagbaligya niini pinaagi sa mas dako nga loan ug mas sayon nga pagbayad alang sa mga myembro.
Giingon usab ni Housing Secretary Jose Ramon Aliling nga ginaaghat nila ang mga developers nga ipaubos o himuong mas abot-kaya ang presyo sa mga condo ug housing units aron mas daghang Pilipino ang makapalit.
Ang bag-ong housing loan program mahimong bayran hangtod 30 ka tuig uban sa interest nga magsugod sa 5.75 porsyento. Samtang ang low-income buyers mahimo gihapon makakuha og 3 porsyento nga interest para sa socialized housing, apan kinahanglan gihapon susihon sa Pag-IBIG kung kaya sa miyembro ang binulan nga bayranan.
Photo Courtesy: PIA
