Nakumpiska sa mga otoridad ang kapin ₱6.4-milyon nga kantidad sa ilegal ug smuggled nga mga sigarilyo human gironda ang usa ka tindahan ug bodega sa Barangay Palomoc, Titay Zamboanga Sibugay hapon sa Mayo 28, 2026.
Gipahigayon ang operasyon bandang alas 3:30 sa hapon pinaagi sa hiniusang pwersa sa Titay Municipal Police Station, ZS MARSPTA, RSOT RMU9, RIU9, ug PIU Zamboanga Sibugay ubos sa Search Warrant No. 317 nga giisyu sa Regional Trial Court.
Sa maong operasyon, gironda sa mga otoridad ang tindahan ug bodega sa usa ka negosyante nga residente sa maong lugar. Dinhi nasakmit ang 102 ka master cases sa Berlin Red cigarettes nga nagkantidad og kapin ₱5.4 milyon, 15 ka master cases sa Fort Menthol nga nagkantidad og ₱805 mil, ug duha ka master cases sa Canon Menthol nga nagkantidad og kapin ₱107 mil, lakip pa ang pipila ka reams sa ubang sigarilyo.
Mikabat sa ₱6,418,224 ang kinatibuk-ang balor sa mga nakumpiskang kontrabando. Gibasa usab sa mga otoridad ang katungod sa suspek ubos sa Miranda Doctrine ug Anti-Torture Law sa pinulongang iyang nasabtan.
Samtang anaa na sa kustodiya sa Zamboanga Sibugay MARSPTA ang suspek alang sa hustong dokumentasyon ug pagpasaka og kaso tungod sa paglapas sa Republic Act 10643 o The Graphic Health Warning Law.
