Arestado ang duha ka mga indibidwal human nabisto nga naghimo og peke nga mga dokumento atubangan sa usa sa mga tulunghaan nga nahimutang sa Barangay San Francisco, Pagadian City, niadtong Mayo 25, 2026.
Nadakpan atol sa operasyon ang mga suspetsado nga nailang sila si alyas Anghel, 28-anyos, residente sa Barangay Alta Tierra Napolan ug si alyas Bon, 31-anyos, residente sa Pitogo, Zamboanga del Sur.
Ang maong mga suspetsado dugay nang gipailawom sa surveillance gumikan sa paghimo ug peke nga mga driver’s license ug paghimo ug peke nga mga NBI clearance. Nagpadayon pa karon ang imbestigasyon sa mga otoridad aron masuta kon may lain pang mga indibidwal nga nagahimo sa samang kalihukan.
Gipahimangnoan usab sa mga otoridad ang publiko batok sa paggamit ug pagpalit og peke nga dokumento aron dili masakpan ug mapasakaan ug kaso.
Photo Courtesy: Pagadian News Daily
