Usa ka biotech company sa Estados Unidos ang nakapahigayon og eksperimento diin malampusong napusa ang mga buhing piso gamit ang artipisyal o 3D-printed nga itlog.
Ang Colossal Biosciences maoy nagpalambo sa maong teknolohiya nga tumong makatabang sa pagpadaghan sa mga nameligrong espisye ug posibleng magamit sa mga proyekto nga may kalabotan sa pagbalik sa mga napuo nga hayop.
Ang artipisyal nga itlog gihulagway nga usa ka 3D-printed nga sudlanan nga adunay silicone membrane sa sulod. Sumala sa kompanya, kini nagtugot sa pagsulod sa oxygen nga susama sa natural nga proseso sa usa ka tinuod nga itlog sa langgam.
Sa eksperimento, maampingong gibalhin sa mga eksperto ang sulod sa biological nga itlog ngadto sa artipisyal nga sudlanan hangtod napusa ang mga piso.
Kabahin sa dugayng plano sa kompanya ang posibilidad nga mabalik ang South Island giant moa, usa ka higanteng langgam sa New Zealand nga napuo sa ika-14 nga siglo. Naghimo usab ang kompanya og mas dako nga bersyon sa artipisyal nga itlog aron mahimong angay alang sa maong espisye.
Bisan pa sa kalampusan sa eksperimento, giingon sa mga eksperto nga daghan pa ang proseso nga pagahimuon sa dili pa posible nga mabalik ang napuo nga langgam. Lakip niini ang pag-analisar ug pagmanipula sa DNA gikan sa karaang mga bukog aron masagol sa genome sa mga buhing langgam
Photo Courtesy: Colossal Biosciences Inc.
