Naanod sa tubig baha ang usa ka amahan og duha ka mga anak niini human sa kalit nga pagbaha nga nahitabo sa Tipolo, Magsaysay Street, likod sa Calinan Memorial Park alas 3:08 sa niadtong nakalabay nga hapon.
Dali nga nagpahigayon sa search and rescue operations ang mga otoridad sa Calinan, Davao City. Kahibaloang ang amahan usa ka 32-anyos ug anak niini nga 8-anyos ang padayon pang gipangita sa rescue teams. Wala pa makumpirma ang ilang kahimtang samtang nagpadayon ang operasyon ug pagpaabot sa dugang detalye gikan sa kapulisan ug mga responder.
Sa pinakabag-ong update, nakita na ang patayng lawas sa usa ka 4-anyos nga bata sa riverside sa Calinan. Samtang padayon pang gisuta ang identidad sa mga biktima.
Sumala sa report, gimanduan na sa City Tactical Operations Center ang mga kasikbit nga police stations sama sa PS11, PS20, PS9 ug PS3 aron mag-monitor sa kahimtangan sa mga suba sulod sa ilang areas of responsibility.
Gipadala usab ang ICC Duty Drone Operators aron motabang sa pagpangita sa mga biktima.
